16/Febreiro/2024

Charla informativa CONTROL E XESTIÓN DA DOR

Durante a mañá de hoxe tivo lugar un obradoiro sobre o Control e xestión da dor durante o cal se abordaron as diferenzas entre a dor crónica e a dor aguda e se proporcionaron habilidades e coñecementos necesarios para mellorar a calidade de vida das persoas que a presentan na súa vida diaria. As persoas asistentes coñeceron algunhas estratexias e recomendacións sobre hábitos de vida saudables que poden axudar a combatir a dor (rutinas diarias, hixiene corporal e postural, sono e descanso, exercicio físico, alimentación saudable...) así como alternativas non farmacolóxicas como fisioterapia, acupuntura, meditación, relaxación, psicoterapia... para o seu tratamento. A actividade realizouse en colaboración coa Escola Galega de Saúde.

10/Febreiro/2024

MARÍA EDELMIRA LEGASPI TRELLES, CELEBROU HOXE 100 ANOS

Hoxe, 10 de febreiro, María Edelmira Legaspi Trelles, celebrou o seu 100 aniversario en Carballido, Alfoz. A alcaldesa, Efigenia Maseda, acompañada polo Concelleiro de Educación, Igualdade e Participación, Eliseo Lorenzo, achegáronse a súa casa e agasallárona cunha placa e un ramo de flores. Dende o Concello de Alfoz, desexámoslle que goce dun moi feliz aniversario.

28/Xaneiro/2024

CHARLA INFORMATIVA "CONTROL E XESTIÓN DA DOR"

Durante o obradoiro proporcionaranse habilidades e coñecementos necesarios para mellorar a calidade de vida das persoas que presentan dor aguda e crónica, así como información sobre diferentes alternativas para a avaliación e tratamento da dor. As persoas interesadas en inscribirse na actividade poden facelo ata o 9 de febreiro, presencialmente no Concello de Alfoz ou no teléfono 982 55 80 01. O obradoiro, impartido por Enrique del Arco Herrero, realízase en colaboración coa Escola Galega de Saúde.

07/Xaneiro/2024

PRESENTACIÓN DO CADERNO Nº 13 DO SEMINARIO DE ESTUDOS DO VALADOURO

O vindeiro venres, 12 de xaneiro, ás 20:00h no Salón de Actos da Casa da Cultura de Alfoz terá lugar a presentación dun novo caderno do SEVA. "Textos e contextos da emigración do Valadouro en Cuba" de Prudencio Vivero Mogo. Organizado polo SEVA coa colaboración da Delegación de Cultura do Concello de Alfoz.

26/Decembro/2023

O Concello de Alfoz deséxalle a toda a veciñanza un Bo Nadal.

22/Decembro/2023

PREMIOS XXI CONCURSO DE POSTAIS DE NADAL

O domingo 17 de decembro, ao remate do espectáculo de Brais das Hortas, fíxeronse públicos os gañadores/as do XXI Concurso de Postais de Nadal. Este ano o premio para a categoría de Educación Infantil foi para MARTIÑO RAMIL VIZOSO, o da categoría de 1º ciclo de Educación Primaria foi para ROI PÉREZ DÍAZ, o da categoría de 2º ciclo de Educación Primaria foi para LEYRE CARBALLAL SOUTO e, ademais, nesta mesma categoría otorgouse un Premio Especial do Xurado a UXÍA VIVERO SANTÍN ante a gran dificultade coa que se atopou o xurado pola calidade de todos os traballos presentados. Todo o alumnado do CEIP Castro de Ouro de Alfoz participante ten un diploma e un pequeno agasallo polo seu esforzo e creatividade. Os nenos e nenas que non o recolleron o pasado 17 de decembro poden achegarse á Biblioteca Municipal (a partir de xaneiro porque agora están de vacacións). Este concurso está incluído dentro das Actividades de Dinamización da Biblioteca, no Plan Único da Deputación Provincial e subvencionado pola mesma.