15/Decembro/2022

CONSELLOS PARA UN NADAL SOSTIBLE. CEIDA (Centro de Extensión Universitaria e Divulgación Ambiental de Galicia)

Dende o CEIDA queremos contribuír a que as vosas festas sexan especiais sen deixar de poñer o foco nas conductas que contribúen á conservación do noso planeta. En Nadal xérase un gasto enerxético superior ao do resto do ano, así como un maior consumo de produtos, unha maior produción de residuos e, en xeral, unha maior depredación dos limitados recursos do planeta. Por este motivo, queríamos deixarvos un consellos para que as vosas festas poidan ser máis sostibles e tamén máis solidarias.

04/Decembro/2022

SÁBADO 17. "XAN PERILLÁN E A MALETA MÁXICA" DE MONICREQUES KUKAS E ENTREGA DE PREMIOS DO XX CONCURSO DE POSTAIS DE NADAL DA BIBLIOTECA PÚBLICA DE ALFOZ

17 de decembro ás 19:00h no Salón de Actos da Casa da Cultura. Monicreques KuKas presenta "Xan Perillán e a maleta máxica". Ao remate da representación entregaranse os premios do XX Concurso de Postais de Nadal que se organiza desde a Biblioteca Municipal e subvencionado pola Deputación Provincial de Lugo. Espectáculo dirixido a público familiar e nenos e nenas a partir de 3 anos que combina clown e pantomima con maxia e manipulación de monicreques. Interpretado por Marcelino de Santiago (Kukas) e dirixido por Isabel Rei. Xan Perillán é un home con sorte, tocoulle nunha rifa unha viaxe a Pernambuco… Pero onde queda Pernambuco? No hemisferio norte ou no sur?... cun pouco de maxia e a axuda dos nenos seguro que o descubrirá. Xunta todas as súas cousas e vainas metendo nunha maleta, pero non é unha maleta calquera pois todo o que nela entra convértese nun truco de maxia. E por riba o seu loro Ravachol aparece e desaparece por arte de birlibirloque...

04/Decembro/2022

VENRES 16 DE DECEMBRO. ÚLTIMA REUNIÓN PARA OS ORZAMENTOS PARTICIPATIVOS ALFOZ 2023.

No Salón de Actos da Casa da Cultura, ás 20:00h terá lugar a reunión coas parroquias de Mor, O Castro e Reirado e coas asociacións e clubs do municipio para os Orzamentos Participativos de Alfoz de 2023. Remata a rolda de xuntanzas iniciadas en outubro coa veciñanza de todas as parroquias co obxectivo principal de escoitar as súas ideas, suxerencias e demandas para mellorar o concello e incorporalas, na medida do posible, nos orzamentos do ano que ven. Ata o de agora hai que destacar unha ampla participación e, polo tanto, aportacións de distinta índole para realizar nun futuro próximo.

02/Decembro/2022

CONCERTO DA ASOCIACIÓN DE ACORDEONISTAS DA MARIÑA. SÁBADO 10 DE DECEMBRO

O sábado, 10 de decembro, terá lugar ás 19:30h no Salón de Actos da Casa da Cultura de Alfoz o Concerto de Acordeóns de man de 15 intérpretes da Mariña. A entrada é de balde e animamos a todo o público a desfrutar da música da man destes artistas.

29/Novembro/2022

ADELÁN. VENRES 2 DE DECEMBRO. 20:00h NA ESCOLA DOS NENOS, REUNIÓN PARA OS ORZAMENTOS PARTICIPATIVOS 2023

26/Novembro/2022

EXPOSICIÓN "OS NOSOS CASTELOS: CASTRO DE OURO E O MARISCAL PARDO DE CELA" NO CASTELO DE CASTRO DE OURO DE ALFOZ

A exposición “Os nosos castelos: Castro de Ouro e ou mariscal Pardo de Cela”. Promovida polo IEGPS coa colaboración do Concello de Alfoz, está comisariada por Eduardo Pardo de Guevara e Valdés, profesor “ad honorem” do CSIC, e conta co patrocinio da Axencia Galega de Turismo. Consta de 14 paneis interactivos sobre o castelo, o mariscal Pardo de Cela e a súa liñaxe, as súas propiedades e o seu impacto cultural. Estará aberta ao público ata o 22 de decembro. O horario de visitas, gratuitas, será os venres, sábados, domingos e festivos, de 10:30h a 14:30h e de 15:30h a 18:30h, fóra das festividades de Nadal e Aninovo.