14/Outubro/2021

SOLICITA O TEU COMPOSTADOR NO CONCELLO DE ALFOZ

Na Casa do Concello ou no teléfono 982 558 001, podes solicitar un compostador de balde para a túa horta ou xardín a través do programa de Autocompostaxe de Sogama ao que o Concello de Alfoz está adscrito. Ademais levarase a cabo unha sesión formativa para todos os participantes e interesados en elaborar o seu propio abono a partir da reutilización de refugallos orgánicos.

11/Outubro/2021

VISITAS GUIADAS DE HISTORIA E ARTE. FINCA GALEA: MUÍÑOS O 23 DE OUTUBRO.

O sábado 23 de outubro, ás 18:00h terá lugar a primeira destas visitas didácticas iniciadas o ano pasado desde a Área de Turismo Municipal e incluidas no Plan Único da Deputación Provincial. Nesta ocasión o lugar elixido é Finca Galea onde, centrándose no muíño con batán incluído. se coñecerá tamén a importancia da industria téxtil de Alfoz no s. XVIII da man de Dolores Barral, profesora de Historia da Arte da USC. É necesaria INSCRICIÓN PREVIA no teléfono 982 558 001 (ext.3) ou na Oficina de Rexistro da Casa do Concello desde o 13 ao 22 de outubro. Prazas limitadas. Actividade de balde. Máis información no mesmo teléfono na extensión 2.

11/Outubro/2021

INICIO DAS REUNIÓNS COA VECIÑANZA: O PEREIRO VENRES 15 DE OUTUBRO ÁS 20:30H NA ESCOLA DO CHAO

O Concello de Alfoz inicia o vindeiro venres, 15 de outubro, a rolda de reunións coa veciñanza das diferentes parroquias para o deseño do vindeiro orzamento municipal, así como para informar sobre diferentes obras, servizos e programas que se están a desenvolver no municipio. Trátase de convocatorias abertas a toda a cidadanía que se levarán a cabo durante os meses de outubro e novembro en cada unha das parroquias de Alfoz coa intención de establecer un diálogo sobre todos aqueles temas de interese e onde recoller as demandas, dúbidas e/ou suxerencias dos veciños e veciñas para mellorar entre todos o noso pobo. Irase comunicando cada semana o lugar da xuntanza en cada parroquia, rematando no Salón de Actos do Centro Sociocultural onde se reunirán S. Pedro de Mor, Reirado, O Castro e as distintas asociacións e clubes non incluidas nas anteriores convocatorias.

08/Outubro/2021

CAMPAÑA DOAZÓN DE SANGUE O 19 DE OUTUBRO EN ALFOZ

O martes, 19 de outubro, de 16:00h a 21:00h, a Unidade Móbil de Doazón de Sangue estará na Seara. A Axencia Galega de Sangue, Órganos e Tecidos é un organismo público dependente da Consellería de Sanidade que engloba o centro de transfusión de Galicia. Entre os seus obxectivos atópase a subministración de compoñentes sanguíneos a todos os hospitais de Galicia de acordo coas súas necesidades.

04/Outubro/2021

OFERTA DE EMPREGO: ANIMADOR/A TURÍSTICO

Pincha na noticia para acceder a toda a documentación. Oferta de emprego publicada no BOP de Lugo de data 4 de outubro, Animador Turístico_Programa: Fomento de Emprego 21-PLAN PROVINCIAL ÚNICO DE COOPERACIÓN COS CONCELLOS 2021 DA DEPUTACIÓN PROVINCIAL DE LUGO

01/Outubro/2021

CLUB DE LECTURA DA BIBLIOTECA MUNICIPAL

O vindeiro 7 de outubro reanudamos as reunións quincenais do Club de lectura. Se estás interesado/a en unirte, podes facelo antes do comezo de cada libro, nesta ocasión ANTES DO 21 DE OUTUBRO para participar da seguinte obra, que neste caso será "O club da calceta" de María Reimóndez. Xuntámonos os xoves, cada quince días, ás 19:00h na Biblioteca. Máis información tfno. 982 558 001 (ext. 2).